《酒樓救亡》
婆婆去到酒樓門口，見到有幾個展櫃裝飾得好靚，仲整埋射燈添，裡面有乾冰，乾冰上就擺咗各種果雕(用疏果雕成)。婆婆走埋去睇咗一陣，知客行過嚟。
知：「阿婆，靚唔靚呀，我哋廚房師傅雕架！」
婆：「靚就好靚嘞，之但係佢哋邊有咁得閒呀？」
知：「唉，你唔知嘞，而家啲生意靜到冇朋友，班師傅冇嘢做，經理咪搞咗個果雕比賽，等佢哋順便練吓刀工囉！」
婆：「又幾得意喎。點比賽呀？」
知：「大家自由發揮，雕得又快又多又靚嘅就贏。」
婆（望向展櫃）：「邊個（作品)贏呀？」
知（指住其中一個作品）：「嗱，第三名係呢個，雕咗四條錦鯉，喺度追逐嬉戲，改名做《玩四鯉》，係咪好神似呢？」
婆：「玩四鯉？又幾寫實喎！第二名呢？」
知（指向旁邊嘅作品）：「第二名係呢個，個師傅雕咗七條錦鯉，條條都跳出水面，改名做《跳七鯉》。」
婆：「雕七條鯉？乜又係錦鯉嘅？」
知：「啲師傅話，我哋酒樓其中一道招牌菜係薑蔥煀鯉，鮮嫩味美，冬天食可以暖胃補身，所以幾乎人人雕鯉…魚囉！」
婆：「唔使講，第一名肯定係雕到九條錦鯉啦！」
知（得意地笑）：「婆婆，你咁聰明嘅？」
婆：「使乜聰明吖，個個讀者睇到呢度都估到你哋係咁啦，雕九鯉吖嘛！」
知（嘴角微翹）：「阿婆果然聰明，不過都有估錯嘅時候，偏偏今次估錯！」
婆：「吓，你哋嘅智力係咁咋喎！咁第一名係…」
知：「你知唔知除咗薑蔥煀鯉，我哋仲有一道菜係遠近馳名架？」
婆：「燒鵝吖嘛！」
知：「叻女！」
婆：「吓，個師傅雕隻鵝出嚟？」
知客點頭，微笑不語，然後舉起食指搖一搖！
婆：「唔止一隻鵝？仲有咩？唔到賣關子啦！」
知：「嗱，佢雕咗一隻鵝同七條鯉魚呀！呢邊呀！」
婆婆望過去，見到七條鯉魚，雖然都很細小，但圍住嗰隻燒鵝。
婆：「好靚喎，啲鯉鯉同鵝都栩栩如生。係呢，個作品叫咩名呀？」
知：「師傅話，都係留返俾嚟參觀嘅食客自己改喎。你認為咩名最適合呢？」
婆：「唓，師傅都咁講咯，咪等讀者自己留言講囉！」
知：「咁又係！呢啲作品擺幾日，之後好似話做好防腐同埋製作石膏模形就拎去拍賣，幫補吓酒樓嘛，底價…」
婆：「就一萬啦，一張消費券！」
知：「吓，咁就冇咗張消費券嗱？」
婆：「唓，而家有券冇埞使啦！梗有人睇中呢啲作品嘅！」
Leave a Reply